МААЕ: Зголемено е зрачењето во нападнатиот ирански комплекс

Меѓународната агенција за атомска енергија (МААЕ) откри опасност од зрачење и хемиски супстанции во нуклеарниот објект Натанз во Иран, иако нивоата на зрачење надвор од комплексот се на нормални нивоа, изјави шефот на таа организација, Рафаел Гроси, пред Советот за безбедност на ОН.

„Сепак, во објектот во Натанз станува збор за радиолошка и хемиска контаминација“. Можно е изотопи на ураниум да се расфрлани низ целата централа“, додаде Гроси.

„Радијацијата првенствено се состои од алфа честички што претставуваат значителна опасност ако се вдишат. Таквиот ризик може ефикасно да се управува со соодветни заштитни мерки“.

Најголемата опасност во објектот е хемиската токсичност, додаде Гроси за комплексот Натанз, кој беше нападнат од Израел пред неколку дена.
Гроси го предупреди Советот за безбедност за ризиците од напади врз други објекти, како што е нуклеарната централа Бушер во Персискиот Залив, каде што се складирани илјадници килограми нуклеарен материјал.

„Сакам апсолутно и целосно да разјаснам, во случај на напад врз нуклеарната централа Бушер, директен удар би резултирал со многу големо ослободување на радиоактивност во околината.“

Шефот на МААЕ, исто така, предупреди против напад врз истражувачки нуклеарен реактор во близина на Техеран, што би барало далекусежни заштитни мерки за делови од иранската престолнина.