Македонија ќе мора да одлучи: Дали сме за Европа или за мегаломански заеми и „српски свет”
Не можеме да постигнеме сите да нѐ сакаат, но треба да постигнеме да никој не нѐ оспорува и во рамките на ЕУ да си влеземе како што сме, Македонци кои зборуваат македонски јазик и тоа е возможно, ние од тоа сме се воделе кога сме го правеле францускиот предлог, порача екс вицепремиерот за европски прашања Бојан Маричиќ во емисијата „Само интервју“.
Затоа, додаде тој, мислам дека треба да се направи напор, ако не се прави тој напор тогаш треба да видиме што правиме, каде одиме.
„Не знам дали забележавте во извештајот на ЕП, кои се едни две точки каде што изразува загриженост ЕП, што не се врзани за Бугарија. Едната е гласањето на Македонија во ОН дека сме гласале наспроти државите членки на ЕУ. И второ дека постојат сериозни елементи во врвот на Владата кои ја промовираат идејата за српски свет. Тоа го пишува во извештајот. Не го измислувам. Тие две точки укажуваат на некои отстапувања од нашите да речам стратешки определби да бидеме добра членка на НАТО и ЕУ. Тие дилеми со тек на време ќе се зголемуваат и ние ќе треба да одговориме на граѓаните и на сите други, да дадеме искрен одговор ако сме за ЕУ – патот е тој, условите се тие нашите црвени линии се тие. Ама ако не влеземе во тој процес, тогаш треба да видиме кој е нашиот развоен модел. Дали ќе се базираме само на овие заеми што ни се даваат…“ заклучи Маричиќ.
Поранешниот вицепремиер за европски прашања Бојан Маричич, во емисијата „Само интервју“ се осврна на предлог амандманот на ЕПП во Европскиот парламент, во Извештајот пред терминот „македонски јазик“ да се додаде „модерен“.
Според Маричиќ, во преговарачката рамка јасно пишува македонски јазик и дека тоа прашање е затворено.
„Јас мислам дека може на крајот да излезе дека ова е експеримент кој ќе заврши на штета на Македонија. Се надевам дека нема да се усвојат оние амандмани кои ги предлагаат бугарските европратеници од сите групи и дека тоа ќе биде спречено и треба сите да се ангажираме да биде спречено. Зошто мислите дека ние во овој момент имаме нешто посилно од тоа што веќе го имаме во преговарачката рамка? Ние во нашиот 7 годишен мандат, не сме дозволувале да се дискутира за било какви придавки на македонскиот јазик“ порача Маричиќ.
Тој потсети и преземените чекори во однос на Бугарија и евроинтеграциите, за време на владеењето на Владата предводена од СДСМ
„Во 2022 беше последниот извештај на ЕП, во 2023 година беше еден деликатен период кога во Бугарија се чекаше да се формира Влада и мислам дека Илхан Ќучук учествуваше во тој процес, наш добар пријател, меѓутоа во тој период тој напиша еден извештај кој беше прилично еднострано претставен, пробугарски и ние кога го видовме тоа се обидовме да разговараме со европратеници кои што беа од груата на социјалисти и демократи да помогнат тоа да не се изгласа. И во заедничка акција, дел од нив, изреагираа и не се донесе никаков извештај. Изразивме став да нема никаков извештај, отколку да има таков каков што беше. Зошто да не го побараме тоа и сега. Нас не ни треба извештај во кој ќе се додаде „современ македонски јазик“. Било каква додавка, придавка, не треба да има, ниту за јазикот ниту за идентитетот. Ние сме се избориле за тоа во преговарачката рамка“ заклучи Маричиќ.
