Македонско-бугарска стопанска комора со порака до премиерите Петков и Ковачевски: „Посејте го семето на пријателство, наместо на омраза!“
„Ја имате почитта и поддршката од целата Комора да пристапите кон суштинските проблеми кои ги мачат двете општества и да најдете решенија кои на двата народи ќе им донесат прогрес, иднин, работни места, економија и поврзување“, вели Кирил Лазаров, претседателот на Македонско-бугарската стопанска комора во Република Северна Македонија во соопштението во очи на посетата на новиот бугарски премиер Кирил Петков на Скопје кога ќе се сретне со својот македонски колега, новиот премиер Димитар Ковачевски.
Лазаров и Комората ги потсетуваат двајцата премиери дека имаат „историска должност кон сите оние кои живеат денес и ќе продолжат да живеат и утре, или после 10, 30 или 50 години, затоа што денес ја пишувате иднината и новата историја, историја во која ќе пишува дека Вие двајцата лидери сте нашле решение со кое ќе има нови автопати, нови гранични премини, во кое ќе профункционира железничката трансферзалаа, ќе имаме директен лет Скопје-Софија и решение во кое ќе дефинирате иднина во која ќе се разговара колку многу наши драги соседи од Бугарија ќе дојдат во Охрид или Маврово, а колку Македонци ќе отидат во Банско или Сончев Брег“.
Во јавното обраќање, бизнисмените од Македонско-бугарската стопанска комора, меѓу другото, ги повикуваат Ковачевски и Петков да го посеат „семето на пријателството наместо на омразата, тоа впрочем им го должиме на нашите деца и поколенија“, со што ќе се запре „миграцискиот пустош кој ни се случува во двете држави и договорете се да останеме тука и да живееме едни покрај други во хармонија, наместо некаде далеку, да бидеме Mакедонци и Бугари во Македонија и Бугарија, наместо странци во Англија и Германија“.
„Бидете оние кои ќе ја напишат новата економска историја и за кои ќе се зборува многу долго од денес па натаму“, е пораката што ја испраќаат членовите на оваа Комора преку обраќањето на нејзиниот претседател Кирил Лазаров пред средбите на највисоко македонско-бугарско владино ниво во Скопје.
