Маричиќ-Јовески: Поддршка за кадровско зајакнување на ЈО за поефикасна борба против корупцијата

– Спроведувањето на Законот за Јавното обвинителство и Законот за Советот на јавните обвинители беше главната тема на денешната средба на министерот за правда Бојан Маричиќ со републичкиот јавен обвинител Љубомир Јовески.

Како што информираат од Министерството за правда на средбата се разговарало за потребите на Јавното обвинителство и зајакнување на кадровските капацитети што би довело до подобрување на ефикасноста во постапувањето по предметите.

-Министерот Маричиќ истакна дека придобивките од новиот Закон за Јавното обвинителство се веќе видливи, алудирајќи на започнатата постапка за избор на пет нови обвинители во Основното јавно обвинителство за гонење на организиран криминал и корупција. Потенцираше дека кадровското зајакнување со стручни соработници за секој јавен обвинител ќе биде вистински ветар во грб и ќе овозможи поефикасна борба против корупцијата, како еден од најгорливите проблеми на нашето општество и истакна дека очекува беспоштедна борба против криминалот и корупцијата, соопштија од Министерството.

Маричиќ и Јовески разговарале и за донесувањето на подзаконските акти кои произлегуваат од Законот за Јавното обвинителство, а кои, според Министерсвото,  се мошне значајни и се однесуваат на постапката и критериумите за оценување на обвинителите.