Марковиќ за 4 news : Савески како „екстензија“ на власта – разочарување уште во првите 48 часа

Именувањето на новиот државен јавен обвинител, Ненад Савески, наместо најавената реформа и независност, донесе само потврда за длабоката подреденост на правосудството кон извршната власт, објави 4news.mk Ова е главниот заклучок од гостувањето на професорот Ненад Марковиќ во емисијата „Ноќно студио“, каде што остра критика беше упатена кон начинот на кој обвинителството продолжува да функционира како „сервис“ на политичките моќници.

Брз „крах“ на надежите за независност

Според анализата изнесена во емисијата, првите денови од мандатот на Савески беа клучни за дефинирање на неговиот правец на делување. Професорот Марковиќ истакна дека Савески „крахираше во првите 48 часа“, демонстрирајќи манир на однесување кој е прилично субмисивен кон извршната власт. Наместо дистанца, јавноста сведочи за постојано присуство на обвинителот во близина на премиерот на разни настани и свечености, што дополнително ја подрива довербата во неговата непристрасност.

„Изборот на Ненад Савески покажа дека ништо нема да се промени во Македонија. Првите 48 часа покажаа дека кај нас обвинителството се доживува како екстензија на извршната власт“, дециден е Марковиќ.

Заклучокот од дебатата е дека Македонија сè уште е далеку од моментот кога обвинителството ќе разбере дека е „само по себе битно“ и посилно од законодавецот. Случајот со Савески е наведен како „разочарувачки начин“ на кој се потврдува дека правосудната власт останува крајно субмисивна кон политичките центри на моќ.

Додека извршната власт го претставува Савески како „најдобар избор“, неговите првични чекори сугерираат дека системот ќе продолжи да се врти во маѓепсаниот круг на политичка контрола и отсуство на вистинска борба против корупцијата.