Марш за 8 Март: Ќе преживеат ли жените овде?
Оваа година ќе се маршира под слоганот: „Ќе преживеат ли жените овде?“, информираат организаторите. Маршот ќе почне во 18 часот на Плоштадот Филип II.
„Да се биде жена или девојка во оваа земја значи секојдневно да се соочуваш со ново прашање за преживување: Дали ќе го преживеам ова возење со такси? Дали ќе го преживеам овој месец? Дали ќе го преживеам браков? Дали ќе го преживеам породувањето? Дали ќе ја преживеам оваа операција? Дали ќе го преживеам насилството? Да се биде жена во Македонија значи да се будиш секое утро во страв и да се прашуваш како и дали ќе го преживееш тој ден.
Овој марш е протестен одраз на случувањата во нашата земја и колективната негрижа кон жените и девојките во секој поглед: од растечките стапки на насилство, фемицидите, секојдневни социјални и здравствени неправди и економска несигурност, до високата сиромаштија која особено ги погодува жените“, стои во повикот до јавноста за приклучување кон маршот.
Од Платформата за родова еднаквост нагласуваат дека во 2023 година, жените и девојките сѐ уште се дискриминирани во секој поглед и не остваруваат ниту еднакви права, ниту еднакви можности, ниту дома, ниту на работа, ниту во политиката, ниту во социјалниот живот.
„Во 2023 година жените се соочени со политики кои не ги препознаваат нивните потреби, со институции кои не ги заштитуваат, механизми кои се слепи кон потребите за унапредување на родовата еднаквост и култура на насилство и мизогинија која постојано се шири.
Затоа, ве повикуваме да марширате заедно со нас – бидејќи родовата нееднаквост е сечиј проблем, а единствено здружено сме посилни. Ве повикуваме заедно да кренеме глас за женските права.
Марширајте со нас, со почеток во 18 часот, дојдете на Плоштад Филип II или приклучете ни се на некоја од точките на рутата. Маршот ќе го завршиме во Паркот Жена Борец, со завршни обраќања до јавноста и институциите“, информираат од Платформа за родова еднаквост и ги охрабруваат учесниците да земат со себе реквизити со кои ќе бидат погласни: свирчиња, тенџериња и дрвени лажици, светлечки батерии, транспаренти.
