“Марш за ангелите“ – родителите ќе бараат ОЈО Кочани целосно да ги запознае со истражната постапка и бараат и домашен и меѓyнароден мониторинг на истрагата и судскиот процес

14.06.2025 19:47

1,100 1 минута читање

Денеска во Кочани се одржи деветтото издание на „Маршот за ангелите“, тивок протест организиран од семејствата на жртвите од трагичниот пожар во ноќниот клуб „Пулс“.

Овојпат, маршот започна точно во 18:05 часот – време кое, според организаторите, симболично ја означува доцната реакција на институциите во моментите кога трагедијата можела да биде спречена.

На родителите им се приклучи и в.д градоначалникот на Кочани, Венко Крстевски.

Една од мајките излезе пред медиумите и истакна дека ништо од Обвинителство не им е јасно, како и дека ќе поднесат барање.

„Ние тука родителите не сме правници, соопштението од јавниот обвинител ни беше дадено по членови, закони, кој што постапил, кој не постапил од Закон за градежни работи, од Кривичниот законик и реално ништо не сфативме. Како најпогодени од трагичниот настан во Кочани, ние родителите и семејствата на починатите деца чувствуваме морална и човечка одговорност да се огласиме, сметаме дека е од суштинско значење ОЈО Кочани конечно и целосно да не запознае со исходот од истражната постапка, како и со содржината на поднесениот обвинителен акт. Кој физички и правни лица се опфатени, против кого се води постапка, а кој лица се изземени од одговорност за да можеме да ги отстраниме сите дилеми кои се јавуваат кај нас во врска со постапката“, вели Марија Петрушевска.

Друга мајка пак побара помош и мониторинг од Коалицијата „Сите за правично судење“, како и од Европската Унија.

Маршот започна од Паркот на револуцијата, продолжи низ трговскиот центар, па помина пред Општина Кочани, а потоа и пред Полициската станица, Основниот суд и Обвинителството.