Маск за обвинувањата дека направил нацистички поздрав: Нападот „Сите се Хитлер“ е истрошен

Милијардерот Елон Маск се огласи откако се соочи со обвинувања дека извршил нацистички поздрав за време на инаугурацијата на Доналд Трамп.

За време на прославата на инаугурацијата во арената „Капитал уан“ во Вашингтон, Маск, извршниот директор на „Тесла“ и основач на „Спејс икс“, изведе движења кои наликуваа на нацистички поздрав.

„Ви благодарам, моето срце е со вас“,рече тој пред да се сврти и да го повтори гестот кон американското знаме.

Овој потег предизвика полемики на интернет, а многумина го опишаа гестот како фашистички поздрав или „необичен“ поздрав.

Новинарката на Си-ен-ен, Кејси Хант, рече „движењето потсетува на работи што сме ги виделе во историјата и е нешто што обично го гледате на американските собири“.

Други на Твитер го обвинија Маск за „изведување на зиг хајл“ и дека тоа е јасно како ден, додека други тврдат дека потегот е неодбранлив и не можел да биде случајност бидејќи двапати го направил тоа.

Меѓутоа, во одбрана на Маск застана Лигата против клевета (Anti-Defamation League – ADL), организација која се бори против антисемитизмот.

Се чини дека тој направи незгоден гест во момент на ентузијазам, а не нацистички поздрав, но повторно, ги цениме луѓето што внимаваат на овие работи“,објави организацијата на Икс.

Тие ги повикаа сите политички партии да ги намалат тензиите во овој деликатен момент и да работат заедно кон единство.

Американската конгресменка Александрија Окасио-Кортез ѝ возврати на групата со седиште во Њујорк.

„Само за да бидам јасна, вие го браните поздравот ‘Хајл Хитлер’ кој беше изведен и повторен заради нагласување и јасност. Луѓето сега официјално можат да престанат да ве гледаат како кој било релевантен извор на информации. Вие работите за нив. Ви благодариме што им го разјаснивте тоа на сите“,напиша таа.

Маск: Нападот „Сите се Хитлер“ е истрошен

Маск одговори со коментар велејќи дека Окасио-Кортез целосно го изгубила умот.

„Искрено, им требаат подобри валкани трикови. Нападот ‘Сите се Хитлер’ е толку истрошен“,напиша тој подолу.