Масовно труење во хотел во познато одморалиште, заразени повеќе од 100 лица

Голем број туристи во Шпанија се соочија со сериозни здравствени проблеми откако симптоми на труење со храна се појавија во познатиот хотел Изан Кавана во Ла Манга, популарно одморалиште во близина на Мурсија.

Се сомнева дека повеќе од 100 од вкупно 800 гости се заразиле со салмонела.

Меѓу нив е 15-месечно бебе и седум деца.

Околу 20 лица се пренесени во болница, додека во самиот хотел на брегот е поставена теренска болница за итни случаи. Гостите пријавиле симптоми како што се гадење, повраќање, дијареја и, во некои случаи, треска, која се појавила по саботниот ручек во ресторанот на хотелот.

Првичните предупредувања беа за околу 28 случаи, но бројот на пациенти набрзо порасна на повеќе од сто. Децата и бебето беа префрлени во болницата Санта Лучија во Картахена, каде што беа лекувани од треска и други симптоми.

Санитарната инспекција зеде примероци од храна од кујната, а хотелот беше привремено затворен. Регионалните здравствени власти потврдија дека инцидентот се третира како веројатна појава на труење со салмонела.

Хотелот, кој на интернет е претставен како еден од најпознатите на Коста Калида, има ресторан со шведска маса (моментално под истрага), бар на плажа, ресторан и англиски паб – кој, според официјалните информации, е привремено затворен.

И покрај сериозноста на ситуацијата, хотелот објави промотивна порака за коктели и мохито на Фејсбук истото утро – без никакво споменување на здравствени проблеми.

Здравствените инспектори ја продолжуваат истрагата, а хотелот се соочува со критики за начинот на кој ја соопштил ситуацијата на гостите. Бројот на болни лица сè уште може да се зголеми, додека властите го истражуваат изворот на контаминацијата и спроведуваат дополнителни здравствени мерки, пишува Мирор.