Меџити: Мора да се реши прашањето со вработените во здравството кои работат со договор на дело

Министерот за здравство Фатмир Меџити денеска во изјава за медиумите рече дека мора да се реши прашањето за здравствените работници кои повеќе години работат по договор на дело.

– Тие работат по пет-шест години со договор на дело, а некои од нив и повеќе години. Затоа прашањето го отворив на седница на Влада минатиот вторник и имавме жолчна расправа со министерот за финансии. Треба да се залагаме овие прашања да ги решаваме и да ги поставиме на прав пат. Едвај ја чекам новата седница на Влада во вторник да видам кои се размислувања и што понатаму, истакна Меџити, одговарајќи на новинарски прашања.

Како што рече, здравството е во тешка состојба и треба да се почне да се работи. Според него, прашањата не може да се решат преку ноќ, но потребна е добра реорганизација во здравството.