Мелбурн останува под строги мерки и покрај незадоволството на граѓаните
Премиерот на Викторија, Даниел Ендрјус денеска го продолжи времетраењето на строгиот режим до 28 септември и претстави план за постепено ублажување на ограничувањата во следните два месеца, пренесе агенцијата „Ројтерс“.
„Засега, не смееме да ги олеснуваме рестриктивните мерки затоа што многу брзо би ја загубиле контролата“, соопшти Ендрјус на прес-конференција.
Викторија е епицентарот на вториот бран на епидемијата и во овој момент има 75% од вкупниот број на заразени лица во Австралија.
Австралиската полиција вчера уапси десетици лица на протестите во Мелбурн против строгите мерки за борба против коронавирусот.
Протести се одржаа и во Сиднеј, Бризбејн, Аделаида и Перт.
Иако се очекуваше премиерот на Викторија денека да објави олабавување на некои мерки, тој одново повика на претпазливост.
