Мицкоски: ВМРО ДПМНЕ е подготвена да поддржи една изборна единица, ако власта го прифати тоа

Лидерот на ВМРО ДПМНЕ, Христијан Мицкоски, е подготвен да прифати една изборна единица и неговата партија ќе го поддржи ваквото решение во парламентот доколку власта го прифати тоа, посебно албанските партии.

Мицкоски ова го изјави во одговор на новинарско прашање при денешниот увид во реализацијата на проектите во Општина Василево, при што истакна дека го прифаќа укажувањето на ОБСЕ изборите да се спроведуваат во една изборна единица.

-Во четвртата изборна единица се избира пратеник со 7 до 7,5 илјади гласови, а во шестата со 5 до 5,5 илјади гласови, тогаш за да се отстрани тоа треба да имаме една изборна единица и секој пратеник што ќе биде избран во макеоднското собрание ќе биде избран со подеднаков број на гласови. Јас апелирам до ДУИ и Алијанска за Албанците да излезат во јавноста и да прифатат една изборна единица и нема потреба од национализам и иредентизам зашто секој граѓанин е еднаков пред Уставот и тие што гласаат во Тетово, Гостивар, треба да се исти со тие во Струмица, Василево и други општини. Затоа власта нека го прифати тоа, а ние како ВМРО ДПМНЕ сме подготвени во парламентот тоа да го поддржиме и да одиме на избори, рече Мицкоски.