Мицковски- американскиот тим за санкции да почне од Владата
Мицкоски, кој денеска беше во посета на општина Аердром на настанот „Твојата идеја за промени“, во контекст на прашањето повторно порача дека решението е „што побрзо да имаме предвремени парламентарни избори со нови луѓе на чело на тие институции толку побргу ќе дојдеме до решение за овој криминал и корупција“.
„Со овие луѓе во овие институции не само што нема надеж, туку корупцијата и криминалот може само да се продлабочуваат. Човекот кој што седум години е на чело на министерството за внатрешни работи, владата која што повеќе од пет години е влада, и партијата која што е дел од таа влада повеќе од 20 години и кои што се причината за криминалот и корупцијата во Република Македонија не можат да бидат решението. Така што било кој тим на истражители треба најпрвен да почне од владата, затоа јас велам што побрзо имаме предвремени парламентарни избори со нови луѓе на чело на тие институции толку побргу ќе дојдеме до решение за овој криминал и корупција“,рече Мицкоски.
Тој посочи дека Министерството за внатрешни работи, Царинската управа, Управата за јавни приходи (УЈП) и Катастарот доколку си ја вршат работата како што треба многу бргу ќе откријат каде има корупција и криминал.
„Еве ќе дадам два примера, првиот пример вклучува три институции, тоа е царината, тоа е МВР и нека биде Управата за јавни приходи. Нека се извади листа од последните пет години, луксузни возила со цена на чинење повеќе од 50 илјади евра, кои се сопствениците на тие возила, а потоа преку УЈП нека се провери годишната даночна пријава на тие луѓе како се стекнале со тие пари за да ги купат тие луксузни возила. Многу едноставно, еве втор пример, институција Катастар и институцијата УЈП нека проверат кои се сопствениците на луксузни станови со вредност на чинење поголема од 100 илјади евра и нека ги проверат нивните годишни даночни пријави, како ги заработиле тие пари. Не треба повеќе да одиме, доволно е само ова да го направат и ќе дојдеме до тоа каде имаме корупција, каде имаме криминал, кои се сопствениците, како се стекнале со тој имот, многу едноставно , не треба многу длабински да навлегуваме па да даваме изјава во насока на поддршка на борбата против криминалот и корупцијата, па тимови специјални“,истакна Мицкоски, додавајќи дека актуелните раководители со овие институции немаат одговор на овие прашања.
Затоа, како што подвлече лидерот на ВМРО-ДПМНЕ, потребни се предвремени парламентарни избори „со нови луѓе во тие институции кои што немаат концесија“.