Милановиќ за македонските евроинтеграции: Има достоинствен живот и без ЕУ

Претседателката Гордана Силјановска-Давкова е во официјална посета на Хрватска, каде што се сретна со хрватскиот колега, Зоран Милановиќ. Милановиќ го коментирал долгорочниот процес на пристапување на Македонија кон Европската Унија, истакнувајќи дека има премногу барања и услови за нас. Тој порачал дека земјава самата одлучува за својот пат.

„Македонија сама одлучува што е подобро за неа и кој пат ќе го избере, претпоставувам дека тоа е патот на благосостојба, мир и спокојство на граѓаните на Македонија. А второто, вклучувајќи ги ЕУ и НАТО, е фасада, еден вид енергетска реновација, но она што ја прави куќата е внатре. Ова се мои мисли, тие не се совет дури ни за првиот сосед до кој живеам, а камоли за целата земја и народ. Истото важи и за Хрватска – ЕУ е надградба, но не и зграда. Нашата куќа и традиција се на наша земја, а ЕУ е добредојдена сезонска приказна додека трае. Тоа е тоа. Има живот без ЕУ, и тоа успешен и достоинствен“, рекол Милановиќ, пренесуваат хрватските медиуми.

Шефицата на македонската држава изјавила дека земјава се соочува со огромен притисок од Европската Унија за промена на Уставот. Таа посочила дека како држава бараме да не се применуваат двојни стандарди врз нив.