Милошоски ја критикува власта за амбасадорите што тој ги блокира
Пратеникот на ВМРО-ДПМНЕ, Антонијо Милошоски, на расправата за изборот на новата влада ја критикуваше надворешната политика на претходната и притоа ја обвини дека е единствена во историјата на Македонија во чие време четири години нема амбасадор во најважната дестинација – Вашингтон. Инаку, голем број на амбасади стоеја или се уште стојат празни со години токму поради блокадите во Комисијата за надворешна политика што ја предводи Антонијо Милошоски, а меѓу нив освен Вашингтон е и Софија, со која имаме тежок политички спор, а рацете дипломатски ни се врзани.
Милошоски ги критикуваше и изјавите од преставници на Владата дека Македонија добила преговори со Унијата, кои се базираа на одлука на лидерите на ЕУ, а се уште не се материјализираа поради ветото на Софија. Тоа беше причина тој да оцени дека кадрите на владеечката коалиција во надворешната политика се искомпримитирани, вклучувајќи го тука и министерот за надворешни работи Бујар Османи кој претходно беше одговорен за ресорот евроинтеграција. Патем во времето на Милошоски како шеф на дипломатијата никој речиси не доаѓаше во посета на Македонија поради политиката што ја водеше владата на ВМРО-ДПМНЕ која беше меѓународно изолирана.
Извор: Независен
