Милошоски: Костадинов крие листа на кандидати за уставни судии кои се многу покомпетентни од Иванова и Талевски

Десетина правници доставиле биографии до Комисијата за избори и именувања за да бидат кандидати за уставни судии, според сознанија на ВМРО-ДПМНЕ што денеска ги објави пратеникот Антонио Милошоски. Тој рече дека меѓу нив има судии со долгогодишен стаж кои би биле многу посоодветен избор од поранешната пратеничка на СДСМ и актуелен генерален секретар на Собранието Цветанка Иванова и адвокатот Васко Талевски. Го повика претседателот на Комисијата за избори и именувања Костадин Костадинов да ја објави листата на оние што испратиле биографии.

„Пратеничката група на ВМРО-ДПМНЕ достави писма до неколку амбасади, вклучително до ЕУ, за неуставни номинации на Цветанка Иванова и Васко Талевски. Според Уставот, функцијата уставен судија е неспоива со членство во партија. Иванова е познато дека е член на СДСМ, а Талевски во јануари го ажурирал членството. Ако бидат избрани, ќе се прекрши членот 111 од Уставот и тоа би било ‘заевизација’ на Уставниот суд“,рече Милошоски.

Според Милошоски, Иванова не го исполнува критериумот на истакнат правник бидејќи дипломирала на Правниот факултет, но немала стручен труд ниту практично искуство.