Митева: Членовите на Судски совет покажаа дека можат да служат само на СДС и ДУИ за да го штитат криминалот и корупцијата

„Знаете како, 2% доверба не е нешто што одеднаш се случува, напротив ова е резултат на многу години погрешни постапки, криминални дејанија во рамки на институциите коишто треба да се борат за владеење на правото, на правдата. Мене не ме изненадуваат реториките или изјавите од овие пет члена од Судскиот Совет, затоа што мислам дека тие не чувствуваат одговорност кон функцијата пратеник, туку напротив чувствуваат  одговорност кон пратеникот што ги изгласал, а во тој случај тоа се СДС и ДУИ“ , прецизираше во своето излагање портпаролката на Влада и член на ИК на ВМРО-ДПМНЕ, Марија Митева во гостување во емисијата „За или против“ на Алфа телевизија.

Митева говореше за  изгласаните интерпелации  на петте члена на Судски совет, додавајќи дека членовите иако немаат кредибилитет да продолжат со извршување на функцијата, истите имаат чувство да служат на СДС и ДУИ  коишто ги поставиле, за да го штитат криминалот и корупцијата.

„И затоа мислам дека не ја чувствуваат обврската на пратениците да им се согласат дека станува збор за нешто за коешто не само пратеникот, туку би кажала и целокупната македонска јавност многупати зборува и зборуваше, и бевме сведоци на состојби какви што не би требало да бидеме сведоци. По однос на онаа дебата којашто се отвори во рамки на Собранието, јас би кажала дека интерпелациите не се само собраниски механизам, туку тоа е една политичка одговорност којашто ние ја покажуваме наспроти сите ветувања коишто ги дадовме и во предизборието, но и многу претходно затоа што чувствуваме дека тоа е потребно на судството“ децидна е Митева.

Митева истакна дека затекнати се инсталации во Судски совет коишто и денес е тешко да се искоренат, додавајќи дека членовите немаат чувство ниту пред граѓаните коишто треба да служат, ниту кон оние кои ги избрале и поставиле да се борат против криминалот и корупцијата. Митева е децидна дека Владата предводена од ВМРО-ДПМНЕ е посветена на она што го ветила пред граѓаните, а тоа е да постои независно судство, борба со криминалот и корупцијата, и враќање на довербата на граѓаните во институциите.

„Јавноста за жал уште еднаш е сведок на инсталации коишто се случуваат од страна на претходната власт, меѓутоа ќе покажаме одговорност, ќе покажеме стабилност, ќе покажеме сериозност. Секогаш сме биле посветени на она што сме го ветиле. Ќе продолжиме да размислуваме во насока дека навистина ни е потребно независно судство, борба со криминалот и корупцијата и да ја вратиме довербата на граѓаните во овие институции“ , заклучува Митева.

Митева: Последните инсталирани кадри на СДСМ и ДУИ во правосудството видоа дека сме сериозни во намерата и почнаа жестоко да се бранат, ќе продолжиме да бараме одговорност

Марија Митева, член на ИК на ВМРО-ДПМНЕ и портпарол на Владата гостуваше во емисијата ,,За или против“ што се емитува на телевизија Алфа и истакна дека ќе продолжат да бараат одговорност од членовите на Судскиот совет преку дебата и интерпелации, нагласувајќи дека независноста на судската власт не значи имунитет од контрола. Таа исто така  ја пофали постапката на пратениците за интерпелации и потсети на неправилностите од страна на претходната власт, при менувањето на позициите. Митева заклучи дека жестоката одбрана од членовите на Судскиот совет нема да донесе позитивен резултат и дека јавната доверба во правосудството е многу ниска.

„Се трудат од сите аспекти да најдат и можеби најминимален аргумент кој што некому ќе му звучи правно поткрепен да го искористат, но забораваат на тоа дека секој носител на јавната функција треба да има една морална и етична вертикала во себе. И ако ова претставува еден вид на политички прогон, ако тие така го сметаат, тогаш што претставува 2% доверба? Што претставуваат судиите и јавните обвинители кои што беа фатени во криминал? Што покажуваат нивните извештаи кои што ги доставуваат до Собранието од година во година, каде што ние гледаме намален интензитет на работа на Судскиот совет? Што покажува нивното делегитимирање сега, после оваа интерпелација, и како истите тие ќе имаат можност и ќе имаат авторитет пред останатите судии да воведуваат некој ред или владеење во рамки на законите во самите судови? Сите овие прашања се добро образложени, сите овие прашања се добро познати на јавноста. Тие ќе се трудат макотрпно да ги задржат тие позиции затоа што се свесни дека без тие позиции ќе ја немаат моќта која што ја имаат во овој момент, свесни се дека СДСМ и ДУИ повеќе не се на власт, свесни се дека едноставно состојбите повеќе не се “како до сега“ и нема да бидат како до сега“, вели Митева.

Митева истакна дека ќе продолжат да се борат за да членовите на Судскиот совет поднесат оставки преку достапните инструменти, нагласувајќи дека независноста на судската власт не значи имунитет од контрола и дека треба да се штитат јавните личности кои постапиле спротивно на законите.

„Едноставно, ќе се борат и понатаму. Тие се, би кажала, можеби последните инсталирани кадри на СДСМ и ДУИ кои што ќе се потрудиме преку дебата, преку сите инструменти кои што ги имаме, еден од нив е интерпелацијата, да покажеме дека навистина сакаме овие лица да поднесат оставки. Ќе кажат дека ова е некој притисок кон судската власт, јас тука само би кажала дека независноста не го дава имунитетот од контрола и надзор кој што Собранието ја има врз носителите на јавните функции. Таа независност не значи имунитет од неспроведување на правото, таа независност не значи вие да не постапувате, таа независност не треба да значи дека треба да ги штитите политичките фигури кои што направиле криминал или кои што постапиле спротивно на законите“, истакна Митева.

Митева истакна дека постапката на пратениците за интерпелации беше пример за одговорност и потсети дека минатата власт ги менуваше позициите без да ги почитува роковите и мандатите.

„Мислам дека им беше еден очаен обид да ги заштитат овие позиции, но со тек на времето ние ќе продолжиме да говориме, ќе продолжиме да бараме одговорност, затоа што граѓаните тоа го заслужуваат. Прво, ценам дека целата постапка која што беше направена од самите пратеници кои што го почитуваат и деловникот на Собранието, го почитуваат и Уставот и законите, победувањето на интерпелациите кое што беше во согласност со законските одредби беше еден чин на покажување на друга одговорност која што ја чувствуваме во рамки на постапувањето. Јас ќе ги потсетам граѓаните дека во минатото со една одлука на влада се менуваа позиции низ целата држава, дури не се ни почитуваше рокот, ни мандатот итн.“, изјави Митева.

Митева истакна дека членовите на Судскиот совет не очекувале толку сериозен одговор, и откако виделе дека процедурите се правилно следени и запазени, започнале да се бранат жестоко, заклучувајќи дека правосудството и Судскиот совет не уживаат висока јавна доверба и дека ќе мораат да се освестат за ситуацијата.

„Некако очекуваа дека ќе постапиме како нив и дека формално, правно ќе биде неуспешна процедура, кога видоа дека процедурално, формално, правно се запазени сите процедури, кога видоа дека навистина сме сериозни во намерата, а тогаш почнаа жестоко да се бранат. На самиот почеток калкулираа, чекаа да видат какви ќе бидат состојбите, беа поблаги, би кажала, во сопствените изјави, за на крајот да резултираат со политички говори од собраниската говорница. Не сметам дека покажувањето на сила или моќ пред пратениците ќе им донесе нешто позитивно. Напротив, мислам дека доколку сега би имале било каква анкета за јавното мислење во однос на правосудството или пак на Судскиот совет, тоа би било и под 2%. Па да видиме дали можеби тогаш ќе се освестат и ќе се запрашаат каде се и што направиле и зошто дозволиле да дојдеме до оваа состојба“, заклучи Митева.

Центар за комуникации на ВМРО-ДПМНЕ