Модринката на Трамп повторно ги разгорува гласините за здравјето
Американскиот претседател Доналд Трамп во понеделник покажа темна модринка на горниот дел од десната рака за време на потпишувањето на извршна наредба во Овалната соба.
Седејќи на Резолут Бирото, Трамп се обиде да ја скрие модринката на десната рака ставајќи ја левата рака врз неа додека разговараше со новинарите.
Минатиот викенд, Трамп беше виден со шминка на раката, наводно за да ја прикрие модринката што се повторува. Но, за време на прес-конференцијата во понеделник, новинарите постојано забележуваа голема модринка на неговата рака.
Модринката беше видлива и кога Трамп го прими својот јужнокорејски колега Ли Џе-мјунг во Овалната соба. Црно-сината дамка е најновата во серијата видливи модринки на раката на 79-годишниот претседател, кој се појавува со истата повреда повремено неколку месеци, понекогаш криејќи ја со шминка.
„Како резултат на ракувањата и аспиринот“
Белата куќа и докторот на Трамп велат дека претседателот е во „одлична здравствена состојба“, а модринката е резултат на честите ракувања и употребата на аспирин.
„Ова е во согласност со блага иритација на меките ткива од честите ракувања, како и употребата на аспирин, што е дел од стандардниот режим за превенција на кардиоваскуларни заболувања“, рече докторот на Трамп, Шон Барбабела. „Тоа е познат и безопасен несакан ефект од терапијата со аспирин“.
Сепак, тој одговор не го задоволи дел од јавноста на социјалните медиуми кои шпекулираа дека Трамп можеби прима медицински третмани преку инфузија или дека прави чести крвни тестови. Трамп неодамна откри дека му е дијагностицирана „хронична венска инсуфициенција“, што значи дека има оток во долните екстремитети бидејќи вените во нозете не ја пумпаат крвта ефикасно назад кон срцето.
Сепак, дијагнозата не изгледа дека е поврзана со модринката на неговата рака.
„Претседателот Трамп се ракува повеќе од кој било претседател досега“
Кога беше прашана за слојот шминка врз неговата модринка минатиот викенд, портпаролката на Белата куќа, Каролина Ливит, рече дека Трамп се ракува повеќе од кој било претседател.
„Претседателот Трамп е човек од народот, тој се среќава со повеќе Американци секој ден и се ракува со нив повеќе од кој било претседател досега. Неговата посветеност е несомнена и тој ја покажува секој ден.“
Претставникот Рони Џексон, поранешен претседателски лекар од 2013 до 2018 година, рече дека Трамп е „најздравиот претседател што некогаш го имала оваа нација“.
Физичкото и менталното здравје на Трамп се предмет на јавна дебата со години, со шпекулации за болестите на кои можеби бил или не бил изложен. Но, јавната недоверба е поттикната од честото одбивање на претседателот да споделува информации за неговото здравје или погрешно да ги претставува.
Неговиот поранешен лекар рече во 2015 година дека Трамп е „најздравата личност некогаш избрана за претседател“, а истиот лекар подоцна им потврди на новинарите дека Трамп „самиот го диктирал целото тоа писмо“.
Според „Индипендент“, за време на првата администрација на Трамп, сериозноста на болеста што ја претрпел кога првпат се заразил со Ковид-19 во 2020 година, исто така била потценета.
Подоцна било откриено дека бил значително поболен отколку што јавноста знаела и дека бил хоспитализиран поради ниска сатурација на кислород, висока температура и проблеми со белите дробови. Трамп честопати жестоко го критикувал поранешниот американски претседател Џо Бајден, тврдејќи дека е неспособен за функцијата и дека крие сериозен здравствен проблем од јавноста.
Кралицата Елизабета II имала слична модринка на раката два дена пред нејзината смрт
Кралицата Елизабета II имала видлива модринка на предниот дел од десната рака два дена пред нејзината смрт, што било забележано на неодамнешна фотографија со поранешната британска премиерка Лиз Трас во замокот Балморал, според Би-Би-Си.
Модринката, видливо темно сина и зголемена, предизвикала загриженост кај јавноста и здравствените експерти, кои шпекулирале дека е резултат на лекови или инфузии, или руптуриран крвен сад.
Поранешниот британски премиер Борис Џонсон во своите мемоари опишал дека кон крајот на својот живот, кралицата била бледа, малку згрбавена и имала темни модринки на рацете, најверојатно поради инјекциските терапии, но нејзиниот ум останал сосема бистар.
