МОН до СОНК: Штрајкот е право, но не и најдобра опција во овој момент – децата да се вратат на настава, зголемување на платите ќе има
Одлуката на СОНК да не го прифати предлогот за покачување на платите на наставниците во износ од 2 500 денари, обезбедени во услови кога државата се соочуваа со здравствена и економска криза, единствено може да се сфати како уцена која ги загрозува интересите на учениците, родителите и семејствата, велат од Министерството за образование и наука.
„Сепак, убедени сме дека оваа одлука не го одразува ставот на мнозинството наставници кои членуваат во синдикалната организација – СОНК и затоа упатуваме апел до сите наставници, кои водени од желбата да учествуваат во создавањето на ученички генерации и во градењето на иднината на државата, всушност одлучиле да се занимаваат со најблагородната професија, да продолжат да работат во интерес на учениците и уште од утре да се вратат на работните места и да ги извршуваат своите работни обврски, овозможувајќи им на младите да продолжат да се надградуваат“,
се вели во соопштението.Од МОН укажуваат дека образованието на младите е најважно и обезбедувањето на континуитет и квалитет на воспитно – образовниот процес секогаш треба да биде највисок приоритет при дејствувањето и одлучувањето на сите општествено чинители и субјекти кои учествуваат во организирањето на овој процес.
Потсетуваат дека Министерството за образование и наука во неколку наврати изминатиот период апелираше до раководството на СОНК заеднички да ја продолжат практиката на паралелно извршување на работните задачи и обврски на вработените во училиштата заради непречено одвивање на работата на образовните установи и на преговарање за решавање на прашања кои ги засегаат. Но, овој пат, како што велат, останува нејасно зошто Синдикатот реши да оди во друга насока.
Од МОН повикуваат учениците да се вратат каде што им е местото и дека повисоки плати мора да има и ќе има.
„Освен покачувањето за 10%, во план е и развивање модел за долгорочно поврзување на системот на плати со минималната плата. МОН ќе продолжи и да ја обезбедува можноста за наставниците и стручните соработници да напредуваат во звања – ментор и советник, што исто така значи повисоки месечни примања за секој кој ќе го оствари ова право. Продолжува и унапредувањето на условите за работа преку континуирани инвестиции во образовната инфраструктура и опремувањето на училиштата – се истакнува во денешното соопштение.
Исто така, од МОН посочуваат дека не треба да постои сомнеж дека грижата за наставниците ќе продолжи и во иднина и потсетуваат дека во изминатите три години, како резултат на волјата на Владата, колективното договарање резултира со зголемување на платите во образованието за над 21%.
„Затоа, да ги вратиме учениците на настава, а решавањето на предизвиците да го препуштиме на социјалниот дијалог. Штрајкот е право, но не и најдобра опција во овој момент и во услови кога постои силна волја за добро решение – апелираат од МОН.
И министерката за труд и социјална политика Јованка Тренчевска претходно изјави дека одбивањето на понудата, е уцена и грижа на Синдикатот за сопствените интереси, а не за интересите на децата и најави дека во градинките ќе се ангажираат заменски воспитувачи и негуватели.
Вчера СОНК најави дека генералниот штрајк ќе продолжи и понатаму, откако Советот на Синдикатот вчера на седница одлучил да не го прифати предлогот на Владата за 10-процентно зголемување на платите со кој би се прекинал штрајкот почнат на 11 април.
Една од причините зошто овој предлог не е прифатен од СОНК е затоа што бил предложен усно, а не во писмена форма, информираа од СОНК, од каде што додаваат дека над 95 проценти од синдикалните организации на СОНК се изјасниле за отфрлање на дадената усна понуда.
За СОНК зголемувањето на платите од 10 проценти во детска заштита, основно и средно образование воопшто не кореспондира со висината на зголемување на минималната плата оваа година и не е соодветна стимулација за враќање на достоинството на професијата. СОНК бара зголемување на платите за 18,4 проценти и нивно усогласување со минималната плата.