На Чулев му останаа уште ден-два шефување со МВР
Наќе Чулев, сегашниот министер за внатрешни работи во техничката влада, уште оваа недела ќе шефува со МВР.
Министерството до изборот на новата влада ќе го води Агим Нухиу, кој од заменик, ќе стане министер за внатрешни работи. Тој го водеше МВР и по парламентарните избори во декември 2016. Тогаш тој остана на функцијата повеќе месеци со оглед на тоа што се одолговлекуваше конститутивната седница на Собранието и изборот на нов претседател на Собранието а потоа и нова влада.
Од местото дополнителен заменик заминува и Славјанка Петровска. Си заминуваат и заменските кадри од ВМРО-ДПМНЕ од министерствата за земјоделство, за информатичко општество и администрација и за финансии. Министрите Димковски и Манчевски ќе продолжат да ги водат министерствата. Манчевски ќе биде во исто време и пратеник, додека не се избере новата Влада.
Технички премиер си останува Оливер Спасовски, кој ќе биде и пратеник со право на глас кога ќе се гласа за конституирање на Парламентот и за избор на нова влада.
