На две опозициски телевизиски станици во Турција им се заканува затворање

На две телевизиски станици во Турција, кои се блиски до главната опозициска Републиканска народна партија, им се заканува трајно затворање поради нивниот критички тон кон владата.

Тоа се Халк ТВ и Созцу, кои се соочуваат со низа санкции од турскиот медиумски регулатор откако ги известуваа масовните протести во земјата, кои започнаа со апсењето на градоначалникот на Истанбул, Екрем Имамоглу.

Во март 2025 година, Турскиот совет за електронски медиуми воведе 10-дневна забрана за Созцу врз основа на тоа дека каналот поттикнува „омраза и непријателство“. Телевизиската станица постојано се жалеше на одлуката, но без успех. Затоа, мора да престане да ја емитува програма денеска на полноќ во траење од 10 дена.

На 26 јуни, слична забрана беше воведена и за Халк ТВ. Требаше да стапи на сила заедно со онаа на Созцу, но по жалбата, на Халк ТВ вчера ѝ беше одобрено еднонеделно одложување на забраната.

Во интервју, главниот уредник на каналот, Суат Токас, вчера изјави дека каналот сè уште е во опасност од трајно затворање. Доколку регулаторот се жали на одлуката за одложување на забраната, таа сепак ќе стапи на сила. Ова би значело затворање на каналот поради низата санкции што му се наметнати.

-Доколку еден канал е санкциониран за истата статија повеќе од еднаш во текот на една година, неговата лиценца може да биде одземена, што доведува до негово трајно затворање, изјави Токас.

„Санкцијата беше изречена поради „коментари дадени од гостин за време на пренос во живо“, но според одлуките „на Уставниот суд на Турција и Европскиот суд за човекови права, Халк ТВ не може да биде одговорна за коментарите на гостите“, рече тој.

„Репортери без граници“ ја осудија одлуката на регулаторот.

-Нема сомнение дека намерата е да се затворат овие опозициски телевизиски станици, рече Ерол Јондероглу од „Репортери без граници“, наведувајќи серија апсења на новинари.

Турција е рангирана на 159-то место од 180 земји во индексот на слобода на изразување на „Репортери без граници“