Најмалку 195 жртви во координираните напади и воени операции во пакистански Белуџистан

Пакистанските сили за безбедност ликвидираа 145 милитанти во рок од 40 часа по серијата координирани напади во Белуџистан, соопшти главниот министер на оваа провинција, Мир Сарфраз Бугти.

Бугти на прес-конференција во Квета појасни дека бројот на жртвите ги вклучува милитантите убиени во акциите во изминатите два дена, како и оние ликвидирани во тековните „операции за чистење“. Армијата претходно соопшти дека само во текот на вчерашниот ден биле убиени 92 борци.

Според Бугти, ова е најголемиот број убиени милитанти во толку краток период од почетокот на засилувањето на бунтовничките дејства. Тој додаде дека во нападите животот го загубиле и 17 припадници на безбедносните сили и 31 цивил, со што вкупниот број на жртви изнесува 195 лица.

Забранетата група „Ослободителна војска на Белуџистан“ презеде одговорност за нападите, наведувајќи дека започнала координирана операција наречена „Хероф“ (Црна бура) насочена против безбедносните сили низ целата провинција.

Пакистанските воени власти тврдат дека нападите се извршени од милитанти спонзорирани од Индија. Официјално Њу Делхи ги отфрли овие наводи како неосновани, обвинувајќи го Исламабад за дефокусирање од внатрешните проблеми.