Најмалку 25 загинати во пожар во ноќен клуб во Индија

Најмалку 25 лица загинале откако избувнал пожар во ноќен клуб во индиската сојузна држава Гоа, јавија локалните медиуми рано изутринава, цитирајќи ја државната полиција.

Повеќето од жртвите се верува дека биле вработени во објектот, објавија „Индиан експрес“ и други медиуми.

Властите се сомневаат дека пожарот, кој избувнал околу полноќ, бил предизвикан од експлозија на плинска боца во кујнскиот простор на клубот, ја цитира новинската агенција ПТИ изјавата на началникот на полицијата во Гоа.

Инцидентот наводно се случил во крајбрежниот град Арпора во северна Гоа, регион познат по своите плажи, ноќен живот и тропска клима што привлекува домашни и странски туристи. Зимските месеци вообичаено се шпиц сезона во најмалата индиска држава, пренесе ДПА.