Најмалку девет лица загинаа во бомбашкиот напад во кафуле во Дамаск

Во кафуле во центарот на Дамаск денеска експлодира импровизирана експлозивна направа при што загинаа најмалку девет лица, а 19 беа повредени, соопшти медицински извор.

Изворот од Дирекцијата за здравство во Дамаск изјави за ДПА дека бројот на загинатите во бомбашкиот напад во текот на вечерта пораснал на девет. Меѓу загинатите има шестмина адвокати, додека неколкумина од повредените и понатаму се во критична состојба.

Експлозијата се случи околу пладне во кафуле во близина на Палатата на правдата во областа Ал-Хамидија во сирискиот главен град.

Гувернерот на Дамаск, Махер Марван, изјави дека експлозијата била предизвикана од импровизирана експлозивна направа и дека безбедносните сили ги прегледуваат снимките од надзорните камери од околното подрачје како дел од истрагата.

Мохамед ал-Тавил, претседател на Сириската адвокатска комора, изјави за ДПА дека во објектот редовно се собирале адвокати. „Според адвокатските групи на социјалните мрежи, идентификувани се имињата на шестмина адвокати кои загинаа, додека осум други се повредени во експлозијата“, рече тој.

Марван изјави дека сите жртви се цивили. Гувернерот истакна дека експлозијата се случила во близина на Палатата на правдата, каде што во моментов се одржуваат судења на лица обвинети за убиства под поранешниот режим на поранешниот претседател Башар ал-Асад. Владата на Ал-Асад беше соборена во 2024 година.