Напаѓачот на новинарите на „ТВ 24“ призна вина, пресудата во петок

Пенов физички го нападна снимателот Љубиша Игнатов, а упати и вербални напади кон новинарот Александар Тодески, додека тие снимаа инсерти пред куќата во која беше пријавено живеалиштето контроверзниот украински олигарх Олександар Онишченко. Пенов упати и јавно извинување до снимателот за физичкиот напад врз него.

Се чувствувам виновен и се каам за стореното дело. Скоро четири дена бев под опсада и малтертирање од повеќе телевизиски екипи. Јас сум болен човек и примам терапија. Јас упатував пцовки, но и снимателот исто така. Со новинарот немав никаков проблем. Искрено се извинувам за стореното дело.

Во текот на денешното рочиште и изведувањето на доказите, одбраната на Пенов изнесе повеќе докази за неговата здравствена состојба, а адвокатот Драган Георгиев рече оти се надева дека судот ќе ги земе предвид и овие околности.

По завршувањето на денешното рочиште, судијката Билјана Коцевска посочи дека пресудата за овој случај ќе биде изречена на 16 декември со почеток во 10 часот.