Недела на перуански филм во Кинотека
Со проекција на играниот филм „Кралици“ во режија на Клаудија Рејнике, од вечер во Кинотеката почнува Недела на перуански филм, во организација на Амбасадата на Република Перу во Букурешт, Кинотеката и почесниот Конзулат на Перу во нашата држава.
Филмот „Кралици“ (Reinas, 2024) по сценарио на Рејнике и Диего Вега Видал, говори за приказна фокусирана на односот меѓу еден татко и неговите ќерки, и нивните општествени предизвици во денешно Перу.
Како што најавија од Кинотеката, утре вечер ќе биде прикажан документарниот филм „Мисија Кипи“ ( Misión Kipi, 2024) на режисерката Сонали Туеста. Станува збор за трогателен и инспиративен филм во кој главната улога ја има роботот наменет за дружење и социјализација со деца кои поминале низ периодот на изолацијата за време на пандемијата со Ковид-19.
Циклусот завршува во сабота, 21 јуни, со играниот „Вкусно сушено овошје“ (Deliciosa Fruta Seca, 2017) на Ана Каридад Санчез – филм што балансира меѓу фикција и документарен пристап, претставувајќи емотивна приказна жена во седмата деценија на животот соочена со финансиска криза, која го преиспитува својот идентитетот и културното наследство.
Од Кинотеката соопштија дека сите три проекции се бесплатни за посетителите. На отворањето на фестивалот свое обраќање ќе има директорот на Кинотеката, Бошко Грујоски и почесниот конзул на Перу во нашата држава, Ненад Јаничевиќ.
