Нема да правиме уставни измени без јасни гаранции и предвидливост на патот кон ЕУ, вели Муцунски

Тој потсети на изјавата на претседателот на Европскиот совет, Антонио Кошта, кој пред околу една година рече дека нашата држава треба да добие дополнителни гаранции, но и на министерот за надворешни работи на Белгија, кој пред неколку дена во Скопје изјави дека нам како на држава треба да ни се дадат дополнителни уверувања.

„Зошто? Затоа што ние треба да ја погледнеме праксата спрема нашата држава. Таа е пракса на 30 години отстапки, најголем дел од нив отстапки од национална природа со ветување за предвидливост и после неколку месеци, повторно да се доведеме во целосно иста ситуација“, рече Муцунски.

Министерот посочи дека истовремено отворено ќе зборува за пристапот на Владата на соседна Бугарија бидејќи не е само прашањето за уставните измени. Гледаме, додаде Муцунски, еден ретрограден пристап кон Акцискиот план за малцинства, документ којшто се подготвува и е во завршна фаза. На него покрај национални експерти работат и меѓународни експерти ангажирани од Советот на Европа.

„Да ја погледнеме праксата на соседна Бугарија во блокирањето на нашата иницијатива за членство во „Трите мориња“, иницијатива која што нема врска со ЕУ, но Бугарија повторно одлучува и во таа меѓународна иницијатива да користи право на вето. Треба да се гради доверба, треба да постапуваме во добра верба, но истовремено ние не можеме лековерно да се поставуваме бидејќи некој ни вели само тоа направете го и понатаму чист ќе ви биде патот“, рече Муцунски.

Нема дилема во кој геостратешки правец се движи државата, вели тој, но во делот на националниот интерес на прашањата поврзани со историја, јазик и идентитет треба да ставиме една конечна, не само точка, туку и извичник — тука државата не е подготвена да преговара.

Муцунски во одговорите на прашањата на пратениците од Европскиот фронт поврзани со ЕУ и уставните измени посочи дека прашањата поврзани со националните отстапки кон македонскиот народ се сериозно болни и тешки и оти немаме никаква гаранција дека тие тука застануваат. Според него, граѓаните во државата без разлика на етничката припадност треба да се обединат и да кажат дека ни е јасен европскиот приоритет, но „истовремено нема потреба да зборуваме за зголемување на апетити, за влошување на меѓуетнички односи“.

„Нашата позиција има два фундаменти. Прво, потребата од институционални гаранции насочени кон потврда дека во периодот кон пристапни преговори на нашата држава македонскиот идентитет, јазик, историја и култура, и посебноста коишто тие ги имаат нема да бидат дел од пристапните преговори и нема да претставуваат услов за напредок на нашиот пат кон полноправно членство. Вториот аспект, рече министерот Муцунски, е нашето очекување дека соседна Бугарија ќе ги почитува своите обврски согласно меѓународното јавно право согласно Европската конвенција за човекови права обврската потврдена на ЕСЧП, а е врзана со регистрација на организациите на Македонците кои живеат во Бугарија“, рече Муцунски.