„НОВИТЕ ДОБРИ ВРЕМИЊА“ Пет години феминистичка платформа Медуза
Феминистичката платформа Медуза ќе го одбележи своето 5 годишно постоење, овој четврток (14.12), од 19:30ч., во локалот Котур. Јубилејот ќе биде одбележан со промоција на публикацијата „Новите добри времиња”, разговор и поетско читање.
Во приог споделуваме повеќе информации за настанот и се надеваме дека ќе ја проследите оваа информација во вашите медуими.
„Во моментов не ни е целосно верно, но нашата платформа, нашето феминистичко засолниште и заедница од која црпиме надеж, моќ и низ која развиваме стратегии на отпор и заедничарење, нашата Медуза, полни 5 години!
Гледајќи назад кон изминатите 5 години, горди сме на нашата упорна, издржлива и креативна заедница, но и разочарани и уморни од локалните и глобалните околности кои нè притискаат и чекаат да попуштиме. Сепак, свесни сме колку е потребно да продолжиме да се здружуваме и оснажнуваме едни со други и токму од тоа место на тврдоглава и упорна феминистичка верба и борба ве покануваме на колективно одбележување на роденденот на Медуза, на 14/12 (четврток) во Котур, од 19:30ч.
Наспроти дефетистичкото мечтаење по „старите добри времиња” кое оваа година ни се чинеше сеприсутно, ние се одваживме да размислуваме, разговараме и пишуваме за можни ~ нови ~ добри времиња. Нашата овогодинешна публикација го носи токму тој „опасен” слоган кој на едно место собра бројни соработнички на Медуза, пријател(к)и, со-сонувач(к)и и личноти од кои сме учеле и кои учеле од нас, кои ги споделија своите мисли, визии, стравови, теории, мечти, копнежи и сомнежи поврзани со иднината. Неизмерно им благодариме на Адриана Захариевиќ, Елена Кузмановска, Ивана Хаџиевска, Ана Аврамовска, Клелија Живковиќ, Маја Петревска, Елизабета Шелева, Ана Јакимска, Ивана Смилевска, Калина Малеска, Мања Величковска, Вики Младенова, Џемилиана Абдулова, Елена Гаговска, Ангел Димитриевси, Кристина Атанасова, Ана Блажева, Сара Миленковска и Лени Фрчкоска, што ја прифатија нашата покана. Како и секоја година, нашата визуелна визионерка е Кристина Атанасова која стои зад дизајнот на „Новите добри времиња”.
А како уште еден подарок од нас за вас, овој четврток нудиме топол и искрен разговор за можната феминистичка иднина на кој уредничките на Медуза, Калиа Димитрова и Душица Лазова, ќе разговараат со Клелија Живковиќ, Ангел Димитриевски и Адора Лимани, по што ќе следи поетско читање со поетесите чии песни ќе ги најдете во публикацијата – Марија Велинова, Калиа Димитрова, Филипа Попова, Ива Дамјановски, Марија Шаклева, Монија Стојановска и Ивана Јовановска – и покана за танц.
„Воопшто не е лесно да гледаш во густиот мрак на иднината од позиција на безнадежна сегашност и да препознаеш поинаков и подобар свет. А, сепак, токму тоа треба да се прави, и тоа постојано.” – Душица Лазова (извадок од заклучокот на публикацијата)
„Годината е 2023. ‘Новите добри времиња’ постојат во истиот простор каде што постојат и „старите добри времиња” – првенствено во нашата имагинација. Но за воопшто да можеме да замислуваме и испишуваме поинаква иднина, која не е репродукција на насилното минато, важно е да ја обзнаниме, прифатиме и отелотвориме неприспособеноста кон времето. Надвор од ова време кое не е наше, никогаш не било и никогаш нема да биде, се наоѓа нашиот свет, смисла, текст, надеж, по кои заедно трагаме, верувајќи дека потрагата не е залудна. Верувајќи во новите, добри времиња кои постојат отаде митолошкото минато и фантазматската иднина, во тоа што правиме сега.” – Калиа Димитрова (извадок од воведот на публикацијата).
