ОЈО закажа брифинг -се очекува да изнесе детали за случајот „Онкологија“

Јавното обвинителство на Република Северна Македонија (ЈОРСМ) за денеска најави брифинг со новинарите на кој се очекува основниот јавен обвинител на Основното јавно обвинителство Скопје Гаврил Бубевски и надлежниот јавен обвинител Ана Гоговска Јакимовска да се изнесат детали за случајот „Онкологија“. По брифингот, од ЈОРСМ најавуваат дека обвинителката Гоговска Јакимовска ќе даде и изјава.

Вчера Обвинителството соопшти дека во врска со случајот „Онкологија“ се извршени претреси на три локации, задржани се четири лица и најавија дека се продолжува со дејствијата.

Од Обвинителството вчера информираа дека преземените дејствија се по налог на јавен обвинител.

Дејствијата кои беа преземени на Клиниката за радиотерапија и онкологија вчера беа во фокусот на јавноста.

По објавата во дел од медиумите дека е приведен ексдиректорот на Клиниката за онкологија и радиотерапија Нино Васев, од Јавното обвинителство на Република Северна Македонија потврдија дека се преземаат дејствија по наредба на јавен обвинител и оти сите други информации се неофицијални.

Организацискиот директор на Клиниката за радиотерапија и онкологија Халид Матоши вчера во изјава за медиумите потврди дека од Клиниката се приведени три лица меѓу кои и поранешниот директор Нино Васев. Од другите двајца, Матоши вели дека едното е медицинско лице од Онкологија, а другото е вработено.

И директорката на Клиниката за радиотерапија и онкологија Виолета Клисарова потврди дека од нивната Клиника вчера се приведени три лица.

Она што таа го потврди е дека универзитетската Клиника за радиотерапија и онкологија работи и функционира нормално.