Обвинение за скопјанецот кој на велешка патарина беше фатен со пиштол

Основното јавно обвинителство Велес поднесе обвинение против 27-годишен скопјанец кого полицијата, пред три месеци, на автопатот Велес – Скопје, на патарината кај Отовица го уапси, бидејќи му пронајде пиштол во возилото, за кој немал дозвола.

„Основното јавно обвинителство Велес до Основен суд Велес поднесе Обвинителен акт против лице од Скопје на возраст од 27 години за кривично дело – Неовластено изработување, држење, посредување и тргување со оружје или распрскувачки материи од член 396 став 1 од Кривичниот законик“, соопштија од Основното јавно обвинителство Велес.

Настанот се случи на 19 мај, кога при контрола, полицијата во возило марка „Фолксваген Голф 5“ најде пиштол марка „Берета“ со калибар од 7,65 мм, кој бил сместен под воланот, во механизмот за подесување на неговата висина.

„Истовремено, надлежниот јавен обвинител до Судот достави и Предлог за продолжување на мерката притвор за обвинетото лице, бидејќи постои опасност од бегство и околности кои укажуваат на опасноста дека повторно ќе го изврши истото кривично дело“, соопштија од Основното јавно обвинителство во Велес.

Обвинетиот скопјанец во моментов е на издржување мерка притвор.