Обвинетите за убиството на ракометарот Тот бараат ново судење – Обвинителството е против

Повторување на постапката во Апелациониот суд побараа бранителите на обвинетите во случајот со убиството на хрватскиот ракометар Денис Тот, каде ги образложија своите жалби на пресудата на Основниот Кривичен суд Скопје.

Тие сметаат дека пресудата е неоснована поради суштествена повреда на одредбите на кривичната постапка, погрешно утврдена фактичка состојба, повреда на Кривичниот законик и одлуката за кривичната санкција.

 

– Advertisements –

 

 

Иле Танев, бранител на обвинетиот Анџело Ѓорѓиевски, на денешната јавна седница истакна дека мотивите што се наведени за убиство, како што рече дека не може да опстојат бидејќи обвинетиот и оштетениот не се познавале.

„Во една ваква состојба не постои никаква умисла. Го оспоруваме делот дека Судот прифаќа дека кај тројцата обвинети се вродила некаква умисла да сите тројца го сторат ова кривично дело. Околностите што им одат во корист на обвинетите не се земени предвид. Како што е расправијата во таксито, начинот на настанатата ситуација и тоа што Анџело дава прва помош“, рече Танев.

 

Според адвокатот, алкохолизирана состојба на ракометарот дала голем придонес за да се случи тоа што се случи и последиците да бидат такви какви што биле.

 

Бранителот на обвинетата Клементина Левковска, Емил Гугутчески, побара предметот да се врати на повторно судење и истакна дека судот не го обезбедил клучниот сведок, односно таксистот.

 

Еленко Миланов, бранител на обвинетиот Андреј Костовски, истакна дека ова дело не може да се квалификува како убиство или соизвршителство.

 

„Неспорно од она што произлегува од тие видео записи е дека по првичниот пад на плочникот на сега починатиот Тот, истиот нема никакво самостојно движење“, рече адвокатот Миланов, образложувајќи дека ударот од Андреј во градниот кош, според него, не можел да доведе до последиците кои настанале.

 

Обвинетите, исто така, се приклучија кон жалбите на своие бранители и истакнаа дека не посакувале да се случи тоа што се случило.

 

Обвинителството предложи жалбите да се одбијат како неосновани, бидејќи, според нив, фактичката состојба е правилно утврдена.

 

Основниот кривичен суд Скопје во ноември лани ги осуди Анџело Ѓорѓиевски и Клементина Левковска по 18 години казна затвор, а Андреј Костовски на 16 години за убиството на хрватскиот ракометар, кој почина на 8 април лани, откако беше претепан од обвинетите пред ноќен клуб во Градскиот парк во Скопје.

Според обвинителниот акт, Ѓорѓиевски, Левковска и Костовски по кратка расправија го нападнале Тот и му задале повеќе удари и тешки телесни повреди од кои кај него најпрво настанала коматозна состојба, а следниот ден починал.

Back to top button
Close