Официјален Пекинг остро го осуди нападот на САД врз Иран

Кина остро го осуди нападот на САД врз Иран и нуклеарните објекти под надзор на Меѓународната агенција за атомска енергија (МААЕ), соопшти денеска кинеското Министерство за надворешни работи.

Министерството во соопштение на својата веб-страница наведува дека овој потег претставува сериозно кршење на Повелбата на ОН и дополнително ја влошува ситуацијата на Блискиот Исток.

Кина ги повикува страните во конфликтот, особено Израел, веднаш да ги запрат нападите и да започнат дијалог и преговори, соопшти кинеското Министерство.

Американскиот претседател Доналд Трамп рано изутрината соопшти дека САД синоќа нападнале три постројки за збогатување ураниум во Иран и дека сите три објекти се целосно уништени. Трамп објави на социјалните мрежи дека е постигнат „спектакуларен воен успех“. Нуклеарните објекти што беа цел на американските бомбардери се Фордо, Натанц и Исфахан.