ОН: Геноцидот во Газа продолжува бидејќи е профитабилен за 60 компании!
Експерт на Обединетите нации именуваше над 60 компании, вклучувајќи големи производители на оружје и технолошки фирми, во извештај во кој се тврди дека се вмешани во поддржување на израелски населби и воени акции во Газа, што таа го нарече „геноцидна кампања“.
Италијанската адвокатка за човекови права Франческа Албанезе, специјална известувачка на ОН за окупираните палестински територии, го состави извештајот врз основа на над 200 поднесоци од држави, бранители на човекови права, компании и академици. Извештајот, објавен неделава, ги повикува компаниите да престанат со зделките со Израел и да бараат правна одговорност за раководителите вмешани во кршења на меѓународното право.
„Додека животот во Газа се уништува, а Западниот Брег е под ескалирачки напад, овој извештај покажува зошто геноцидот на Израел продолжува: затоа што е профитабилен за многумина“, напиша Албанезе во документот од 27 страници. Таа ги обвини корпоративните субјекти дека се „финансиски поврзани за израелскиот апартхејд и милитаризам“.
Израелската мисија во Женева изјави дека извештајот е „правно неоснован, клеветнички и претставува очигледна злоупотреба на нејзината функција“. Канцеларијата на израелскиот премиер и Министерството за надворешни работи не одговорија веднаш на барањата за коментар.
Израел ги отфрли обвинувањата за геноцид во Газа, повикувајќи се на своето право на самоодбрана по нападот на Хамас на 7 октомври 2023 година, во кој загинаа 1.200 луѓе и резултираше со 251 заложник, според израелските бројки. Последователната војна во Газа уби повеќе од 56.000 луѓе, според Министерството за здравство на Газа и ја сведе енклавата на урнатини.
Извештајот ги групира компаниите по сектори, на пример воени или технолошки и не секогаш јасно појаснува дали се поврзани со населбите или со кампањата во Газа. Се вели дека околу 15 компании одговориле директно на канцеларијата на Албанезе, но не ги објавиле нивните одговори. Во изештајот таа наведува воени гиганти како што се „Локид Мартин“ и „Леонардо“, тврдејќи дека нивното оружје е користено во Газа. Исто така, ги наведува добавувачите на тешка механизација Caterpillar Inc и HD Hyundai, тврдејќи дека нивната опрема придонела за уништување на имот на палестинските територии.
Caterpillar претходно изјави дека очекува неговите производи да се користат во согласност со меѓународното хуманитарно право. Ниту една од компаниите не одговори веднаш на барањата на Ројтерс за коментар.
Технолошките гиганти Alphabet, Amazon, Microsoft и IBM беа именувани како „централни за израелскиот апарат за надзор и тековното уништување на Газа“. Alphabet претходно го бранеше својот договор за услугиод 1,2 милијарди долари со израелската влада, наведувајќи дека не е насочен кон воени или разузнавачки операции. Palantir Technologies беше исто така споменат за обезбедување алатки за вештачка интелигенција на израелската војска, иако не беа вклучени специфики за нивната употреба.
Извештајот се проширува на претходната база на податоци на ОН за фирми поврзани со израелските населби, последен пат ажурирана во јуни 2023 година, додавајќи нови компании и детално опишувајќи ги наводните врски со тековниот конфликт во Газа. Извештајот ќе биде презентиран пред Советот за човекови права на ОН, кој има 47 члена, во четврток. Иако Советот нема правно обврзувачки овластувања, случаите документирани од истрагите на ОН стигнуваат до меѓународните обвинителства. Израел и САД се повлекоа од Советот претходно оваа година, наведувајќи пристрасност кон Израел како причина за тоа.
