ОН: Регистрирано е рекордно ширење на израелските населби на палестинските територии

Израелските населби на окупираните палестински територии се проширија на рекордно ниво, ставајќи ја во опасност практичната можност за создавање палестинска држава, изјави високиот комесар на ОН за човекови права, Фолкер Турк.

Тој посочи дека Израел придонел за растот на израелските населби со префрлање на своето население, што според него е воено злосторство.

Администрацијата на американскиот претседател Џо Бајден минатиот месец изјави дека населбите не се во согласност со меѓународното право, откако Тел Авив ги објави плановите за изградба на нови домови на окупираниот Западен Брег.

– Насилството меѓу доселениците достигна шокантни нови нивоа, ставајќи го во ризик практичното создавање на одржлива палестинска држава, наведува Турк во извештајот на 16 страници.

Во извештајот, заснован на мониторинг телото на ОН, како и на други извори, се документирани 24.300 нови израелски станбени единици на окупираниот Западен Брег за една година, до крајот на октомври 2023 година.

Исто така се забележува дека има драматично зголемување на интензитетот, сериозноста и заканата на израелските доселеници и израелската држава против Палестинците на окупираниот Западен Брег, особено по смртоносниот напад на Хамас во јужен Израел на 7 октомври.

Израел тврди дека има библиско право на земјата каде што се населуваат еврејските доселениците.