Османи и Маричиќ одат во Париз и во Брисел следната седмица, за да го објаснат новиот пристап со Бугарија
Ќе учиме од грешките и искуства од првиот циклус, кој почна добро и имаше резултати со Договорот за добрососедство, вели шефот на дипломатијата, нагласувајќи дека Скопје и Софија влегуваат во нов – втор циклус од преговорите
Скопје и Софија влегуваат во нов – втор циклус во однос на обидите да се најде решение за европерспективата на Северна Македонија, вели министерот за надворешни работи, Бујар Османи, за новиот процес на преговори со Бугарија, за кој рече дека е динамизиран по меѓувладината седница и изборите во двете држави.
Во „Само интервју“ на ТВ Канал 5, Османи рече дека двете влади се договорија да почне нова динамика на процесот, со платформа за враќање на довербата преку честа комуникација и соработка.
„Ќе учиме од грешките и искуства од првиот циклус, кој почна добро, имаше резултати со Договорот за добрососедство и беше големо постигнување во билатералните односи. Се надеваме дека во овој втор циклус, кој сега го почнуваме, ќе го крунисаме позитивно во интерес на европската перспектива на регионот, се разбира и на билатералната соработка“,
рече Османи, додавајќи дека за тоа ќе помогнат формираните работни групи, а во фокус ќе се стави иднината со што полесно ќе се решаваат предизвиците.
Поставени се краткорочни циклуси и средби неделно – на 1 февруари средба ќе има економска група, на 7 февруари – групата за инфраструктура, за евроинтеграции на 14 следниот месец, а една недела подоцна ќе се состане и образовната работна група. Секоја петта недела ќе се состанува и комисијата за историски и образовни прашања, а по неколку месеци, како пресек на нивната работа, повторно ќе има заедничка седница на двете влади.