Османи: Луѓето се принудени да земаат бугарски пасош од социјални причини, не можат да ги поистоветуваат државјанството и етничката припадност
Министерот за надворешни работи Бујар Османи во интервју за бугарска БТВ, во однос на прашање околу пописот, посочи дека секој имал различни реакции, а реагирале и Македонците, албанските партии, српските партии и бугарските.
„Немаше кој не реагираше. Ова е секогаш случај. Мислам дека пописот е правилно спроведен со оглед на тоа што не е направен 20 години. Пописот е важен за нас – тој не е само статистичка активност, бидејќи ја одредува и природата на етничките прашања во нашата земја. Затоа се работеше толку внимателно, имаше толку многу контролни механизми што овој процес никако не можеше да се загрози. Мислам дека нашиот Завод за статистика треба да излезе и да ги објасни сите овие прашања што ги покренуваат здруженијата и партиите на Бугарите. Природно е бугарските партии, како и партиите од сите други етнички групи, да се свртат кон институциите. Но, на институциите во Скопје, а не да доаѓа во Софија да се жали. Тие се наши граѓани и сакаме да се интегрираат во нашето општество, да ги бараат своите права во Република Северна Македонија, а ние сме должни како официјални институции да одговориме на нивните прашања“, вели Османи.
Тој додава дека нема точни информации колку граѓани имаат бугарски пасоши. „Се разбира, бугарскиот пасош има многу повеќе предности од македонскиот, бидејќи е европски пасош. А луѓето се принудени да земаат бугарски пасош од социјални причини. Значи не можат да ги поистоветуваат државјанството и етничката припадност. Но, прашањата за пописот, прашањата за слободата на граѓаните слободно да се дефинираат – мислам дека се апсолутно суштински – Република Северна Македонија ги гарантира и, се разбира, се повеќе и повеќе ќе ги зајакнува“, вели Османи.
