Осуммина загинати во руски ракетен напад врз станбена зграда во Харков

Осум лица загинаа, а повеќе се повредени во руски ракетен напад врз станбена зграда во источниот украински град Харков, втор по големина во земјата, соопштија денеска украинските власти.

Гувернерот на Харковската област Олег Синегубов на Телеграм објави дека балистичка ракета во текот на ноќта погодила станбена зграда, при што загинале најмалку осум лица. Меѓу жртвите се наставничка и нејзиниот син, како и уште една жена и нејзината 13-годишна ќерка.

Тој додаде дека бројот на жртвите се зголемувал во текот на утрото, додека спасувачките екипи извлекувале тела од урнатините.

Фотографии од местото на нападот покажуваат тешко оштетена петкатна станбена зграда, при што големи делови од конструкцијата се разнесени од ударот на ракетата.

Украинскиот претседател Володимир Зеленски изјави дека во нападите се повредени повеќе од 10 лица.

Според него, Русија лансирала 29 ракети – речиси половината балистички – како и 480 беспилотни летала, најголем дел од типот „Шахед“, кон Украина. Меѓу целите повторно била и енергетската инфраструктура.

Зеленски наведе дека напади се регистрирани во повеќе региони, меѓу кои Киев, западните области Хмелницки и Чернивци, како и железничката инфраструктура во северозападниот регион Житомир.

Штета е пријавена и во областите Днипропетровск, Запорожје, Виница, Одеса, Полтава, Суми и Черкаси.

Украинскиот претседател повторно ги повика западните сојузници да ја повикаат Русија на одговорност за, како што рече, „бруталните напади врз човечки животи“ и побара поблиска соработка со Европската Унија за зајакнување на украинската противвоздушна одбрана.