Откриено кој го нарачал убиството во Шиша бар: Падна и Шенки Версаче!
Шенаси Мислани, познат како Шенки Версаче, неговиот брат Мирвет Мислани, како и Абдула Садики и Акиф Мемиши од синоќа се во Шутка како дел од групата Беланоца/Барон, објави порталот 24/7.
Со разбивањето на криминалниот клан од Арачиново, се откри кој го нарачал филмското убиство во Шиша бар и кој стои зад уште шест ликвидации извршени во последните четири години. Убиствата ги извршувал кланот на Фатљум Ајети-Тоте, кој и од затвор го раководел нарко-картелот и ги нарачувал елиминациите на противниците. Тоте се смета за лидер на Беланоца, а истрагата собра докази дека оваа група стои и зад неколку обиди за убиства кои со години останаа нерасчистени.
Во вчерашната полициска акција за еден ден беа расветлени 8 убиства, 3 обиди за ликвидација, како и безброј случаи на изнуда, закани и рекет – повеќе решени случаи отколку во изминатите години под претходното раководство на МВР.
Во криминалната група од 18 лица, освен Тоте, се и Гани Туша и Зулќуфли Нуредини-Мали Репки, кои од затворот во Идризово продолжиле да раководат со активностите на Беланоца/Барон. На крајот на ноември, за Гани Туша беше отворена истрага како главен осомничен за ликвидацијата на Орхан Бајрами – Оки во јули минатата година во Ханиоти.
Огромни пари се кеширале за крвавите пресметки, од 10 илјади до 250 илјади евра за да се ликвидираат „непосакуваните“ во криминалното подземје. Само во оваа акција им биле пронајдени околу половина милион евра, а од бункерите во Чаир и Арачиново кои ги копала македонската армија освен пари нашле злато и оружје. Ова нема да е последна акција на МВР за развибавање на скопското криминално подземје, најави Тошковски, а на удар се сите, па дури и најголемите кланови чии членови за прв пат се најдоа зад решетки.
„Криминалните банди немаат место во нашата држава, а нивните активности нема да бидат толерирани. Најавивме бескомпромисна борба со организираниот криминал и денес покажавме дека можеме сериозно да опстоиме на нашите намери“, рече Тошковски на вчерашната прес-конференција.
Сепак, кртови во МВР дојавиле дека полицијата ќе им чукне на врата за многу брзо, па еден од осомничените се дал во бегство 10 минути пред да му стават лисици на рацете.
За тоа ќе има одговорност, рече министерот за внатрешни работи. Пред лицето на правдата ќе се најдат и тие кои што ги викале полициските службеници во партиски штаб за да им диригираат во полициските акции не смеат да учествуваат.
