Отворена истрага за турскиот државјанин што се обиде да прошверцува над 13 килограми злато, обвинителството бара притвор

Основното јавно обвинителство Куманово, постапувајќи по поднесена кривична пријава, донесе Наредба за спроведување истражна постапка против турски државјанин со живеалиште во Скопје, кој е осомничен за кривично дело – Криумчарење од член 278 став 3 во врска со став 1 од Кривичниот законик.

Од Обвинителството денеска соопштија детали за осомничениот. Се работи за 55-годишник кој бил корисник на старосна пензија во Турција, додека во земјава бил ангажиран со договор на дело како возач на автобус во превозник од Скопје. Тој на 7 август, додека управувал со автобус на редовна линија Пореч, (Хрватска) – Гостивар (СМакедонија), на граничниот премин Табановце, преку царинска линија, при влез во земјава, се обидел да ја избегне царинската контрола и пренел непријавена стока од големи размери – златен накит, часовници и златни плочки во вкупна вредност од 36 305 644 денари.

Пратката со златни предмети претходно ја зел од хрватски државјанин и ја скрил во делот каде што се наоѓа вентилацијата на автобусот.

При контрола од овластени царински службеници таму биле пронајдени 18 пакувања во кои имало 97 златни прстени, 39 златни огрлици, 133 златни нараквици, 4 парчиња нараквици со полускапоцени камења, 5 парчиња сини златни нараквици, 8 парчиња жолти златни нараквици, 5 парчиња гумени нараквици со златни плочки, 5 парчиња часовници златни без механизми и нивни делови, 33 парчиња златни приврзоци, 91 парчиња златни обетки, 23 парчиња златни монети, 48 парчиња златен кршен накит, 73 парчиња златни плочки во правоаголна и друга форма и 3 пакети злато во гранули. Златните предмети биле со вкупна тежина од 13,3 килограми.

Основно јавно обвинителство Куманово до судијата на претходна постапка на Основниот суд во Куманово поднесе предлог за определување на мерката притвор против осомничениот, бидејќи постои основан страв дека може да се даде во бегство, но и да го повтори кривичното дело доколку се брани од слобода

Back to top button
Close