„Ова е мафијашки империјализам“: Украинци реагираат на договорот на Трамп за подземните резерви
Според американскиот претседател Доналд Трамп, подземните резерви на Украина сега треба да припаѓаат на Америка.
Минатата недела, новиот американски секретар за финансии, Скот Бесент, ја посети Украина. Тој му претстави на украинскиот претседател Володимир Зеленски неочекувано барање за половина од минералното богатство на Украина, како и за нафта, гас и инфраструктура, како што се пристаништа. Сметката од 500 милијарди долари беше „враќање на долговите“ за претходната американска воена помош на Украина, објасни Белата куќа.
Зеленски одби да го потпише договорот. Тој јасно стави до знаење дека Вашингтон мора да даде безбедносни гаранции пред да се постигне договор за огромните природни ресурси на земјата, кои претставуваат околу 5% од светските резерви на минерали. Тој, исто така, истакна дека САД имаат дадено 69,2 милијарди долари воена помош – помалку од сумата што сега ја бара Трамп – и додаде дека други партнери како ЕУ, Канада и Обединетото Кралство исто така може да бидат заинтересирани за инвестирање.
Коментаторите го опишаа агресивниот ултиматум на Трамп како „мафијашки империјализам“, „колонијален договор“ и како потсетување на она што Европејците го правеа во 18-от век кога ја разделија Африка.
„Оваа идеја е претерана,“ рече Тетиана Сливенко, локална администраторка во Лиодијане. „Тој сака да земе ресурси од земја во време на војна. Како треба да живееме? Имаме деца. Изгледа како САД да сакаат да нè лишат од нашиот економски потенцијал. Тоа би нè уништило, исто како што Америка направи со домородните Американци.“
„Изгледа како да ја загубивме војната против Америка. Ова ми изгледа како репарации,“ рече Володимир Ланда, старши економист во Центарот за економска стратегија, тинк-тенк во Киев. Вкупните резерви на Украина вредат 14.8 трилиони долари. Тие вклучуваат литиум, титан и ураниум, како и јаглен, челик, железна руда и подморски гас од шкрилци. Многу од депониите не биле развиени, рече Ланда, или затоа што не биле изводливи, или поради политичка нестабилност.
Жителите кои живеат во близина на Лиодијане кадешто има резерви на литиум, рекоа дека ја поддржуваат изградбата на нов рудник. Сепак, тие не се подготвени да ги предадат профитите на Трамп.
Трамп изјави дека сака дел од „ретките земји“, класа од 17 минерали. Всушност, Украина има многу малку од овие. Изгледа дека американскиот претседател ги помешал со ретки метали и критични материјали, како што се литиумот и графитот. Денис Аљошин, главен стратегиски директор на УкраЛитиумМајнинг, посочи уште една заблуда – дека брзо може да се направи профит. „Луѓето мислат дека ќе ставиш лопата во земјата и ќе ископаш пари. Работиме на еден проект пет или шест години. Со инвестиции, можеме да започнеме со производство дури во 2028 година,“ објасни тој. (Гардијан)
