Падна Владата на Холандија

Холандската влада утрово падна откако Герт Вилдерс, лидер на крајно десничарската Партија за слобода (PVV), поднесе оставка од владејачката коалиција поради несогласувања околу плановите за азил, објавија холандските медиуми.

„Нема потписи за нашите планови за азил, нема промени во главниот коалициски договор. PVV ја напушта коалицијата“, напиша Вилдерс на социјалните мрежи.

На прес-конференција минатата недела, Вилдерс презентираше план од десет точки за намалување на миграцијата, вклучувајќи распоредување на армијата за обезбедување и патролирање на границите, затворање на центрите за прием на бегалци и враќање на сите сириски бегалци во Сирија, тврдејќи дека земјата повеќе не е земја со висок ризик.

Вчера, тој побара од тројца други партиски лидери да ги „потпишат“ плановите и да обезбедат спроведување на некои мерки во рок од неколку недели. Во спротивно, тој објави дека ќе ја напушти коалицијата.

Четирите партии се состанаа вчера вечерта и повторно утрово, каде што Вилдерс го потврди своето заминување, објавува Dutch News.

Извор: mk.21tv.tv