Папата Лав XIV бара да се ослободат новинарите кои моментно се во затворите низ светот

Тој разговараше со некои од 6.000 новинари кои дојдоа во Рим за да го следат изборот на папата.

Тој ги повика новинарите да користат зборови на мир, да се дистанцираат од војната и да им дадат глас на оние кои го немаат.

Тој ја изрази својата солидарност со новинарите ширум светот кои се затворени поради, како што рече, потрагата по вистината и нивното известување.

„Црквата препознава во овие сведоци – мислам на оние кои известуваат за војната дури и по цена на своите животи – храброста на оние кои го бранат достоинството, правдата и правото на луѓето да бидат информирани, бидејќи само информирани поединци можат да донесуваат слободни одлуки“, рече новиот папа.

Страдањето на притворените новинари, додаде тој, е предизвик за државите и меѓународната заедница и ги повикува сите да го заштитат „скапоцениот дар на слободата на говорот и медиумите“.