Парти ги негира новите обвиненија за силување

Поранешниот фудбалер на Арсенал и репрезентативец на Гана, Томас Парти, ќе се изјасни невин по двете нови обвиненија за силување, најави денеска неговиот адвокат во судот во Лондон.

Триесетидвегодишниот фудбалер од средниот ред, кој во моментов настапува за шпански Виљареал, веќе чека судење по претходни обвиненија кои вклучуваат пет обвиненија за силување на две жени, како и едно обвинение за сексуален напад врз трето лице.

Новите обвиненија дојдоа откако друга жена тврдеше дека Парти ја силувал двапати во исти ден во декември 2020 година.

Парти не присуствуваше на денешното рочиште, а неговата адвокатка, Ема Фен, рече дека нејзиниот клиент планира да се изјасни невин по двете нови обвиненија. Следното рочиште е закажано за 10 април, а судењето треба да започне во ноември. Обвинителството тврди дека наводните злосторства се извршени помеѓу 2021 и 2022 година.