Пентагон: Војната во Иран досега ги чини САД 29 милијарди долари

Војната на САД во Иран досега чини 29 милијарди долари, што е за четири милијарди повеќе во споредба со проценките од минатиот месец, соопшти висок претставник на Пентагон.

Џулс Херст, вршител на должноста главен финансиски директор на Пентагон, денеска пред законодавците соопшти дека новата сума вклучува ажурирани трошоци за поправка и замена на опремата, како и оперативни трошоци. Тој го изнесе овој извештај заедно со американскиот министер за одбрана, Пит Хегсет и претседателот на Здружениот штаб на вооружените сили на САД, Дан Кејн.

Сепак, останува нејасно како Пентагон дошол до прецизната цифра од 29 милијарди долари. Во март, официјален претставник за „Ројтерс“ изјави дека администрацијата на Трамп проценила дека само првите шест дена од војната чинеле најмалку 11,3 милијарди долари.

Овие податоци доаѓаат на само шест месеци пред изборите за Конгресот во САД. Демократите, кои стојат добро во анкетите, се обидуваат да ја поврзат војната во Иран со зголемените трошоци за живот на американските граѓани, додека републиканците на претседателот Доналд Трамп се соочуваат со тешка битка за зачувување на мнозинството во Претставничкиот дом.