Пировска: Ставот на академик Ќулавкова на твитер можеше да доведе до разгорување на националистичките страсти

Хелсиншкиот комитет поднесе тужба против академик Катица Ќулавкова за нејзината објава на социјалните мрежи, за кои велат дека поттикнувале нетолеранција меѓу етничките заедници. Нејзиниот твит, „Ја плаќаме цената за соживот со живот“, подразбира дека причина за ширењето на вирусот се меѓуетничките односи, а не непочитувањето на мерките, сметаат од Комитетот.

Од Хелсиншки заклучуваат дека кризата создадена од корона вирусот ги влошила меѓуетничките односи. Како што соопштуваат, многу фактори влијаеа на оваа состојба: Молчењето на институциите пред волјата на верските власти кои делуваа спротивно на сите препораки за заштита на јавното здравје, функционирањето на државата со техничка влада, селективното известување на медиумите, масовните дезинформации, но исто така и поттикнувањето говор на омраза по етничка основа од јавни личности“- се вели во реакцијата на Хелсиншкиот комитет.

По бројните реакции за објавата на академик Ќулавкова, таа ги затвори профилите на социјалните мрежи Твитер и Фејсбук.

-Фактот дека е академик е уште поголема причина ние да поднесеме пријава. Судот во Стразбур наведува дека јавните личности имаат уште поголема одговорност околу ваквите изјави. Ставот на академик Ќулавкова на твитер можеше да доведе до разгорување на националистичките страсти што е многу опасно за земја како што е Македонија, изјави во Утрински брифинг, извршната директорка на Хелсиншкиот комитет за човекови права, Уранија Пировска.

-Ние сме опкружени со говор на омраза. Она што придонесува кон тоа оваа појава да се засилува е фактот дека нема санкции. Луѓето како да не се свесни дека тоа страшно дело. Но податокот дека има само една пресуда против говор на омраза, води кон тоа дека луѓето смеат изкажат став па макар тој бил и говор на омраза. Сметам дека никој не смее да биде недопирлив кога се работи за вакви случаи, особено кога се работи за академици и професори“, додаде Пировска