Платите на ректорите на универзитетите во земјава се од 3 до 4 илјади евра месечно

Овие податоци ги објави Форумот за образовни промени во истражувањето со наслов „Платите и додатоците во јавните универзитети во Северна Македонија“. Истражувањето покажува како се уредуваат платите на наставниот и ненаставниот кадар во јавните универзитети со средства од државниот буџет, како и врз функсионалните додатоци што ги добиваат ректорите и деканите. Само во последните четири години, Владата има издвоено 18,5 милијарди денари од јавни средстсва за финансирање на јавните и јавно-приватните универзитети.

Или нето-плати на ректорите на јавните универзитети во земјава, без додаток за минат труд се следни:

· Ректорката на Универзитетот „Св. Кирил и Методиј“ – Скопје добива вкупно 203 775 денари нето, од кои 100 000 денари се функционален додаток, а остатокот е плата за редовен професор.

·Ректорот на Универзитетот во Тетово добива 194 984 денари нето, од кои 91 209 денари се функционален додаток, од кој е одземен само персоналниот данок.

·Ректорот на Универзитетот „Мајка Тереза“ – Скопје добива 155 982 денари нето, од кои 52 200 денари се додаток за функцијата „ректор“.

·Ректорот на Универзитетот „Гоце Делчев“ – Штип добива 136 758 денари нето, од кои 32 983 денари се функционален додаток.

·Универзитетот на Југоисточна Европа (УЈИЕ) претставува исклучок, бидејќи платата на ректорот е фиксна: 211 252 денари нето, без дополнителни функционални додатоци.

Платите на наставниот и ненаставниот кадар во јавните високообразовни установи постојано растат, а бројот на професори и соработници во нив изнесува 4 656.

Истражувачот за наставниот кадар пресметал само основна нето плата, без додатоците за стаж што изнесуваат 0,5 отсто за секоја завршена година, а најмногу до 20 отсто, како и надоместоци за учество во комисии, менторства и слично. Од друга страна, за пресметка на месечните нето приходи на ректорите, истражувачот ги вклучил и функционалните додатоци, кои се исплаќаат од сопствените средства на универзитетот.

Истражувањето е спроведено целосно врз основа на анализа на закони, прописи, колективни договори и други потребни документи. Поради ниското ниво на транспарентност, повеќето од потребните документи не се објавени на веб-страниците на универзитетите. Воедно, Форумот за образовни промени ги повика универзитетите да ги објавуваат на своите веб-страници сите правилници и одлуки за исплата на плати, надоместоци и додатоци за сите вработени.