По брзата реакција на противпожарната единица, нема повредени штитеници во пожарот во кавадаречкиот дом за стари лица

Сите штитеници во Домот за стари лица Д-р Јанески, лоциран во село Чемерско, на околу 24 километри од Кавадарци се добри, нема повредени лица, и се уште трае нивната евакуација. Тие моментално се носат во кавадаречката болница на преглед, а како што изјавија за ,,Фокус” од управата на домот, на време бил забележан пожарот и навреме се реагирало.

-Вработени во домот го забележале пожарот, од кој е оштетен средишниот дел од кровот. Се уште не можеме да зборуваме за проценка на штета, ниту пак за причина за пожарот, најважно е што сите станари се добро.

Се носат на преглед во болница, бидејќи таква е процедурата. Првиот и вториот кат се недопрени, значи можат да функционираат без проблем, на санација на штетата на покривот ќе се работи наредниот период и веруваме дека за неколку дена се ќе биде во ред, велат од домот Д-р Јанески.

Додаваат дека се благодарни на ТППЕ Кавадарци, чии екипи пристигнале по околу 45 минути од пријавата, иако домот се наоѓа надвор од градот. Веднаш дошле и полициски екипи, како и екипи на итната медицинска служба.

Од ЦУК исто така соопштија дека нема податоци за настрадани лица. Меѓу сместените лица во домот петмина се неподвижни. Градоначалникот на Кавадарци ќе побара од Итната медицинска помош од Неготино да испрати возило на испомош, додаваат од ЦУК.

Сите лица што биле смесетени во домот се живи и безбедно се извлечени од објектот. Тие ќе бидат евакуирани во Општата болница во Кавадарци. Во моментот има потреба од дополнителни возила од Итната помош од Велес за транспорт на лицата коишто се неподвижни во лежечка положба.

Инаку, ПУСЗ Дом Д-р Јанески е лиценцирана приватна установа за социјална заштита за нега и грижа на стари лица