По една деценија вратени 20 украдени македонски икони откриени во Албанија

По една деценија дваесет икони откриени во Албанија, а кои биле украдени од повеќе макеоднски православни цркви, се вратени во Македонија. Примопредавањето е направено во Тирана, при средбата на македонската министерка за култура Бисера Костадиновска-Стојчевска со нејзината колешка од Република Албанија, Елва Маргарити. Се работи за вредни икони, главно, од Струшкиот Регион, кои беа случајно препознаени преку албанските медиуми од македонските експерти во 2013 година.

-Успешната соработка е потврда за пријателството и довербата што ги негуваме како министерства за култура на Северна Македонија и на Албанија, посочи Костадиновска-Стојчевска, потенцирајќи ги добрата волја и посветеноста од двете страни за заштита и промоција на заедничките културни обележја.

Таа им се заблагодари на албанските институции и служби кои ги запленија овие вредни дела, а крадците ги соочија со правдата.

На средбата, пак, албанската министерка Маргарити истакна дека соработката ќе продолжи.

-Ќе продолжиме со зацврстување на соработката меѓу нашите две земји во областа на културата, зачувувањето на наследството и бескомпромисната борба против нелегалното движење на нашето материјално културно богатство, рече таа.

Постапката се финализира по ратификацијата на договорот во двете држави, со што е отворен процесот за враќање и на други икони од Албанија што беа идентификувани.

Како што посочуваат од Министерството за култура, во наредниот период, во Музејот на Македонија ќе се изврши процес на нивна заштита, по што ќе бидат изложени, а потоа и вратени на Македонската православна црква.