Почина инструменталистот, композитор и првенец на „Танец“, Милан Завков

„Почитувани, со голема тага и во неверување ви ја пренесуваме жалната вест дека ненадејно, во 61. година од животот, почина врвниот инструменталист и композитор, првенец на „Танец“ и долгогодишен раководител на оркестарот, Милан Завков“, објави утрово на својот официјален фејсбук-профил Националната установа за народни игри и песни „Танец“, чиј првенец беше Завков.

Во 61. година од животот ненадејно почина врвниот инструменталист, композитор и првенец на „Танец“ и долгогодишен раководител на оркестарот на Националната установа, Милан Завков.

Жалната вест утрово на својот официјален фејсбук-профил ја објави Националната установа – ансамбл за народни игри и песни „Танец“.

„Почитувани, со голема тага и во неверување ви ја пренесуваме жалната вест дека ненадејно, во 61. година од животот, почина врвниот инструменталист и композитор, првенец на „Танец“ и долгогодишен раководител на оркестарот, Милан Завков“,објави „Танец“.

Од Националната установа потсетуваат дека љубовта кон музиката на Милан Завков почнува од детството. Тој почнал да свири хармоника од осумгодишна возраст, а веќе на четиринаесет години станува член на оркестарот на тогашниот „Млад Танец“ со кој раководел Ѓорѓи Димчевски. Потоа, неговите младински денови ги поминува свирејќи во Културно-уметничкото друштво „Мирче Ацев“, уште тогаш знаејќи дека музиката ќе стане негова животна и професионална определба. Во тоа време на Факултетот за музичка уметност во Скопје сè уште не постоеле студии по хармоника и така Завков се определува за неговиот втор инструмент, контрабасот и со успех дипломира на одделот за гудачки инструменти.

„Но, без разлика на видот на дипломата, Милан Завков ја продолжува кариерата на својот прв и единствен избор – хармониката и остварува неверојатно богата изведувачка, но и творечка кариера. Во 1970 година, со популарниот „Октет Македонија“ ја снима својата прва плоча, а во својата над четиридецениска кариера на полето на народната музика, самостојно, во различни соработки, како и со познатата група „Македонски мерак“ остварува врвни музички интерпретации и сигнификатен опус на композиции и аранжмани за многубројни изведувачи“соопшти „Танец“.

Завков на сцената има соработувано со многу имиња, а зад него ќе останат над 150 авторски творби, многу трајни снимки и повеќе дискографски изданија.

Меѓу нив се врвните хит-мелодии како „Заиграј со мене“, отпеана од Виолета Томовска, „Камен да беше срцето“ и „Свири мајсторе“ од Гоце Арнаудов, „Нема друга Македонија“ од Војо Стојаноски, „Лична Јовано“ и „Лазарополе“ од Наум Петрески, „Пат за Стамболград“ и „Мораш душо да ме разбереш“ од Благица Павловска, како и други создадени за Атина Апостолова, Пепи Бафтировски, Сузана Спасовска, Ленче Кукиќ, Миле Кузмановски, Зуица Лазова, Милица Кузмановска, Ефто Пупиновски.

„Милан Завков низ годините се истакнува и како солист инструменталист со многу ора и чочеци и се здобива со углед на еден од најдобрите хармоникаши во Македонија, но и на просторите на поранешна Југославија“,се наведува во објавата на „Танец“.

Од 2000 година Милан Завков беше вработен во Националниот ансамбл за народни игри и песни „Танец“, како музичар-инструметалист првенец и долгогодишен раководител на оркестарот, со кој остварува многубројни концерти и турнеи во земјата и насекаде низ светот.

„Националната установа `Танец` од името на сите вработени го изразува своето најдлабоко сочувство до почитувачите на Милан Заков и до целото семејство Завкови“се наведува во објавата.