Почна вонредниот самит на ЕУ за Белорусија

– Вонредниот самит на Европската унија за кризата во Белорусија почна денеска напладне, напиша на Твитер портпаролот на Европскиот совет, Баренд Лејтс.

Претседателот на Европскиот совет, Шарл Мишел, свика итна видео-конференциска средба на лидерите на Европската унија за Белорусија, каде протестите траат веќе 11 дена од реизборот на претседателот Александар Лукашенко.

На самитот ќе се разговара за продолжување на санкциите против белоруските функционери, откако во петокот беше одобрено санкционирање по спорните претседателски избори.

Европските лидери вчера го повикаа рускиот претседател Владимир Путин да изврши притисок врз Лукашенко, кому му е клучен сојузник, да влезе во дијалог со опозицијата. Во одделни телефонски разговори со Путин ова го побараа францускиот претседател Емануел Макрон, германската канцеларка Ангела Меркел и претседателот на Европскиот совет Шарл Мишел.

На изборите на 9 август Лукашенко беше избран за претседател на Белорусија по шести пат, освојувајќи, како што покажуваат официјалните резултати, 80 проценти од гласовите, а кандидатката за опозиција Светлана Тихановска 10 проценти.

Веднаш по објавувањето на првите изборни резултати, започнаа масовни демонстрации низ целата земја, во кои граѓаните бараат заминување на Лукашенко, кој со земјата владее веќе 26 години.

Back to top button
Close